මෙම ගෝලීය වැඩසටහන Impact Hallmarks (IH) ආයතනය විසින් සංවිධානය කරනු ලබන්නකි.
‘The Mirror of Rectitude’ යන තේමාව යටතේ පැවැත්වෙන මෙම මත විමසුම සඳහා රටවල් 195 කින් පුද්ගලයන් මිලියන 1.9 ක් අතරින් තෝරාගත් විශිෂ්ටයන් 181 දෙනෙකු ඇතුළත් කර ඇත.
වසර 25 ක් පුරා සිදුකළ දීර්ඝකාලීන තක්සේරුවකින් අනතුරුව, දැනුම, පරිසර සංරක්ෂණය සහ සමාජ ප්රත්යස්ථතාව යන ක්ෂේත්ර කෙරෙහි දැවැන්ත බලපෑමක් කළ පුද්ගලයින් මෙලෙස නම් කර තිබේ.
ශ්රී ලංකාවෙන් තේරී පත් වූ විශිෂ්ටයෝ
මෙම ගෝලීය නාමාවලියට ශ්රී ලංකාව නියෝජනය කරමින් ක්ෂේත්ර කිහිපයක ප්රවීණයන් සිව්දෙනෙකු ඇතුළත් වී ඇත.
- ආචාර්ය ජෙහාන් පෙරේරා: සාමය, මානව හිමිකම් සහ ජාතීන් අතර සංහිඳියාව වෙනුවෙන් පෙනී සිටින ප්රමුඛ පෙළේ ක්රියාධරයෙකි.
- මහාචාර්ය චන්ද්ර වික්රමසිංහ: තාරකා ජීව විද්යාව (Astrobiology) සහ ජීවයේ විශ්වීය සම්භවය පිළිබඳ විප්ලවීය මත ඉදිරිපත් කළ ලොව පිළිගත් තාරකා භෞතික විද්යාඥයෙකි.
- ආචාර්ය ආශා ද වෝස්: උතුරු ඉන්දියන් සාගරයේ වෙසෙන නිල් තල්මසුන් පිළිබඳ පර්යේෂණ සිදුකළ සාගර විද්යාඥවරියක වන ඇය, දේශීයව මෙහෙයවන සාගර සංරක්ෂණ ක්රියාවලීන් වෙනුවෙන් ජාත්යන්තර මට්ටමින් පෙනී සිටියි.
- ආචාර්ය ඒ. ටී. ආරියරත්න (සර්වෝදය නිර්මාතෘ): දශක ගණනාවක් තිස්සේ සාමූහික ක්රියාකාරීත්වය සහ බිම් මට්ටමේ සංවර්ධනය හරහා ග්රාමීය ප්රජාවන් සවිබල ගැන්වීම වෙනුවෙන් කළ මෙහෙය මෙහිදී අගය කර ඇත.
අනෙකුත් දකුණු ආසියානු නියෝජනයන්
- ඉන්දියාව: ළමා ශ්රමයට එරෙහිව සටන් වැදුණු නොබෙල් ත්යාගලාභී කයිලාෂ් සත්යාර්ථි, අඩු පිරිවැය වෛද්ය තාක්ෂණ නිපැයුම්කරු නිතේෂ් කුමාර් ජංගීර්, අණුක ජීව විද්යාඥ ආචාර්ය ෆාතිමා බෙනසීර් සහ එවරස්ට් තරණය කළ ලොව පළමු ආබාධිත කාන්තාව වන අරුණිමා සිංහා මෙයට ඇතුළත් ය.
- පාකිස්ථානය: බහුවිධ විද්යාඥ මහාචාර්ය ඖරංසෙබ් හෆී, පොලී රහිත ක්ෂුද්ර මූල්ය ජාලයක් බිහි කළ ආචාර්ය මුහම්මද් අම්ජාද් සාකිබ් සහ මානුෂීය සේවක පර්වීන් සයීඩ් නම් කර ඇත. මීට අමතරව ගාසා තීරයේ දරුවන් වෙනුවෙන් හඬ නගන තරුණ ක්රියාකාරීන් වන ගුලාම් බිෂර් හෆී සහ උබයිඩා අල් ෆිද්දා හෆියා ද මෙම ලැයිස්තුවට එක්ව සිටිති.
- බංග්ලාදේශය: ඉතාමත් දිළිඳු ජනතාව වෙනුවෙන් පොලී රහිත ණය ලබාදෙන ‘Struggling Members Program’ වැඩසටහන හඳුන්වා දුන් මහාචාර්ය මුහම්මද් යූනුස් නම් කර තිබේ.
- නේපාලය: සිරගතව සිටින දෙමාපියන්ගේ දරුවන්ගේ අධ්යාපනය සහ රැකවරණය වෙනුවෙන් කටයුතු කරන පුෂ්පා බස්නෙට් නම් කර ඇත.
- චීනය: සිය ගණනකගේ දිවි බේරාගත් ස්වේච්ඡා සේවක චෙන් සි, ප්රකට ගණිතඥ ෂිං-තුන්ග් යාඕ සහ කාන්තාර වන වගාවෙන් හරිත කළ යී ජිෆැන්ග් ද මෙම නාමාවලියට ඇතුළත් ය.
Impact Hallmarks (IH) අවධාරණය කරන්නේ මෙය ජනප්රියත්වය මනින තරඟයක් නොව, 21 වන සියවසේ මුල් දශක කිහිපය තුළ ලෝකය යහපත් කිරීමට සැබෑ ලෙසම දායක වූ පුද්ගලයින්ගේ කුසලතාවයන් (Merit) අගය කරන ලේඛනයක් බවයි.
මෙම ජාත්යන්තර මත විමසුම හරහා ලොව පුරා සිටින විද්වතුන්ට සහ මහජනතාවට මෙම විශිෂ්ටයින්ගේ සේවය ඇගයීමට අවස්ථාව සැලසෙයි.
