මෙම තත්ත්වය හමුවේ මෙරට සංචාරක උපායමාර්ග වහාම වෙනස් කළ යුතු බව එම සංගමය අනතුරු අඟවයි.

ශ්‍රී ලංකාවට පැමිණෙන සංචාරකයින්ගෙන් 30%ක් පමණ මැදපෙරදිග ගුවන් තොටුපළ හරහා මෙරටට පැමිණෙති. ගුවන් කලාප වසා දැමීම සහ ගුවන් ගමන් අවලංගු වීම හේතුවෙන් මෙම සංචාරක ප්‍රවාහයට දැඩි බාධා එල්ල වී තිබේ.

මෙම අර්බුදයෙන් සිදුවන බලපෑම අවම කර ගැනීම සඳහා රජය, ශ්‍රී ලංකන් ගුවන් සමාගම සහ සංචාරක බලධාරීන් එක්ව කටයුතු කළ යුතු බව එම සංගමය අවධාරණය කරයි. විශේෂයෙන්ම ආසියානු කලාපීය වෙළඳපොළවල් කෙරෙහි වැඩි අවධානයක් යොමු කරන ලෙස ඔවුහු යෝජනා කරති.

යුරෝපීය සංචාරකයින් පැමිණෙන දීර්ඝ ගුවන් ගමන්වලට බාධා පැමිණ ඇති බැවින් ඉන්දියාව, ඕස්ට්‍රේලියාව, චීනය සහ නැගෙනහිර ආසියානු රටවල් සමඟ ගුවන් සබඳතා ශක්තිමත් කළ යුතු බව SLAITO සභාපති නලින් ජයසුන්දර ප්‍රකාශ කළේය.

එමෙන්ම, ගැටුම් රහිත කලාපවල සිට මෙරටට පියාසර කරන ගුවන් සමාගම් සඳහා විශේෂ සහන ලබා දෙන ලෙස ද සංගමය ඉල්ලා සිටියි. ගුවන් තොටුපළ බදු සහ ඉන්ධන පිරිවැය සම්බන්ධයෙන් සහන ලබා දීම හරහා වැඩි ගුවන් යානා ප්‍රමාණයක් මෙරටට ගෙන්වා ගත හැකි බව ඔවුන්ගේ විශ්වාසයයි.

ගෝලීය වශයෙන් ඉන්ධන මිල ඉහළ යාම සහ ගුවන් ගමන් ගාස්තු වැඩි වීම හේතුවෙන් 2026 වසරේ අගභාගය වන විට සංචාරක ක්ෂේත්‍රයේ වර්ධනය තවදුරටත් මන්දගාමී විය හැකි බවට ද ක්‍රියාකරුවන් අනතුරු අඟවා ඇත.

සංචාරකයින්ගේ පැමිණීම පහතට : මැදපෙරදිග සිට පැමිණෙන සංචාරකයින්ගේ ප්‍රමාණය පසුගිය සති කිහිපය තුළ 25%ත් 30%ත් අතර ප්‍රමාණයකින් පහත වැටී ඇති බව සංචාරක නියෝජ්‍ය අමාත්‍ය මහාචාර්ය රුවන් රණසිංහ තහවුරු කළේය.

මැදපෙරදිග කලාපය යුරෝපීය සංචාරකයින් සඳහා ප්‍රධාන සංක්‍රමණික මධ්‍යස්ථානයක් ලෙස ක්‍රියා කරයි. මෙම සංක්‍රමණික ගුවන් ගමන් අඩුවීම මෙරට සංචාරක ක්ෂේත්‍රයට ඍජුවම බලපා ඇති බව නියෝජ්‍ය අමාත්‍යවරයා සඳහන් කළේය.

සංචාරක ක්ෂේත්‍රය සඳහා විශේෂ ඉන්ධන QR පද්ධතියක් : මැදපෙරදිග අර්බුදය හේතුවෙන් ඇති විය හැකි ඉන්ධන සැපයුම් බාධාවන්ට විසඳුමක් ලෙස, සංචාරක ක්ෂේත්‍රය සඳහා පමණක් වෙන්වූ විශේෂ QR කේත පද්ධතියක් හඳුන්වා දීමට රජය තීරණය කර ඇත.

මේ පිළිබඳව අදාළ බලධාරීන් සමඟ සාකච්ඡා පවත්වා ඇති අතර, අද (17) දින සවස් වන විට මෙම නව පද්ධතිය හඳුන්වා දීමට අපේක්ෂා කරන බව නියෝජ්‍ය අමාත්‍යවරයා පැවසීය.

සංචාරක හෝටල්, ප්‍රවාහන සේවා සපයන්නන් සහ අනෙකුත් සේවාවන් බාධාවකින් තොරව පවත්වාගෙන යාම තහවුරු කිරීම රජයේ අරමුණයි. ගෝලීය සැපයුම් දාමයන් අඩාල වුව ද මෙරට සංචාරක කටයුතු අඛණ්ඩව කරගෙන යාමට මෙය පූර්ව ආරක්ෂිත පියවරක් ලෙස ක්‍රියාත්මක කෙරේ.