එම ආයතනයේ දකුණු ආසියානු කළමනාකරු ග්‍රෙගරි ස්මිත් පෙන්වා දෙන්නේ 2022 වසරේ ඇති වූ දරුණු ආර්ථික අර්බුදය ශ්‍රී ලාංකිකයන් කිසිසේත්ම අමතක නොකළ යුතු බවයි.

කැපී පෙනෙන පසුබෑමක් සහ යථා තත්ත්වයට පත්වීම

2023 වසර අවසානයේදී ඇමරිකානු ඩොලර් 3,800ක් දක්වා පහත වැටුණු ඒක පුද්ගල දළ දේශීය නිෂ්පාදිතය මේ වන විට ඩොලර් 4,800ක් දක්වා වර්ධනය වී ඇත. මෙය රටේ ආර්ථිකය ස්ථාවර වීමේ වැදගත් සන්ධිස්ථානයක් ලෙස සැලකේ.

ශ්‍රී ලංකාව දැන් අඛණ්ඩව කාර්තු 10ක් පුරා ධනාත්මක ආර්ථික වර්ධනයක් පෙන්නුම් කරමින් සිටියි. 2025 වසරේදී 4.85%ක සහ 2026 වසරේදී 4.5%ක වර්ධනයක් අපේක්ෂා කරන බව ස්මිත් මහතා පවසයි.

සංචාරක පැමිණීම් සහ විදේශ ප්‍රේෂණ ඉහළ යාම මෙම ආර්ථික පිබිදීමට ප්‍රධාන වශයෙන්ම බලපා ඇත. සංචාරකයන්ගේ පැමිණීම මිලියන 2.3 දක්වා ඉහළ ගොස් ඇති අතර, විදේශ ප්‍රේෂණ ප්‍රමාණය 2025 වසරේදී ඩොලර් බිලියන 8ක් දක්වා වර්ධනය වී තිබේ.

මෙම ආර්ථික දියුණුව පිළිබඳව අදහස් දක්වමින් ග්‍රෙගරි ස්මිත් කියා සිටියේ:

“ශ්‍රී ලංකාවේ ආර්ථිකය යථා තත්ත්වයට පත්වීම ඉතා සාර්ථකයි. නමුත් එය තවමත් පවතින්නේ අවදානම් සහගත මට්ටමකයි. එබැවින් අඛණ්ඩ ප්‍රතිපත්තිමය විනයක් පවත්වා ගැනීම අත්‍යවශ්‍යයි.”

රටේ ආර්ථිකය යථා තත්ත්වයට පත් වුවද, සෘජු විදේශ ආයෝජන තවමත් පවතින්නේ ඉතා පහළ මට්ටමකය. එය දළ දේශීය නිෂ්පාදිතයෙන් 1%කටත් වඩා අඩු අගයකි. රටේ වර්ධනය වේගවත් කිරීමට නම් විදේශ ආයෝජන මීට වඩා දිරිමත් කළ යුතු බව IFC කළමනාකරු පෙන්වා දෙයි.

ආර්ථික ස්ථාවරත්වයක අවශ්‍යතාවය

ආර්ථිකය දෙගුණයකින් වර්ධනය කිරීමට නම් ඉදිරි වසර 10 පුරාම කිසිදු බාධාවකින් තොරව සාර්ව ආර්ථික ස්ථාවරත්වය පවත්වා ගත යුතුය. මේ සඳහා ජාත්‍යන්තර මූල්‍ය අරමුදලේ වැඩසටහනෙන් බැහැර නොවීම තීරණාත්මක බව ස්මිත් අවධාරණය කරයි.

අවසාන වශයෙන් ඔහු ශ්‍රී ලාංකිකයන්ට මතක් කර දෙන්නේ මෙවැනි අදහසකි:

“ඉන්ධන පෝලිම්, ආදායම් අහිමි වීම් සහ ඔබ අත්වින්ද දුෂ්කරතා අමතක නොකරන්න. ආර්ථික ස්ථාවරත්වයට තර්ජනයක් වන වැරදි ප්‍රතිපත්ති ක්‍රියාත්මක වන විට, ඒවාට එරෙහි වීමට මහජනතාව සහ ව්‍යාපාරික ප්‍රජාව පෙළ ගැසිය යුතුයි.”