ඒ අනුව මෙය 2023 වසරේ තෙවන කාර්තුවේ සිට මෙරට ආර්ථිකය අඛණ්ඩව ධනාත්මක වර්ධනයක් පෙන්නුම් කළ නවවන අවස්ථාව වීම විශේෂත්වයකි.

විවිධ ආර්ථික අංශ අනුව වර්ධනය :

• කර්මාන්ත අංශය: මෙකී කාලසීමාව තුළ ඉහළම වර්ධනයක් වාර්තා කර ඇත්තේ කර්මාන්ත අංශයයි. එය 8.1%ක වර්ධනයක් පෙන්නුම් කර ඇති අතර, මෙහිදී ඉදිකිරීම් ක්ෂේත්‍රය (12.2%) සහ පිරිපහදු කළ ඛනිජ තෙල් නිෂ්පාදන ක්‍රියාවලිය මේ සඳහා ප්‍රබල දායකත්වයක් ලබා දී ඇත.
• සේවා අංශය: සේවා අංශය 3.5%ක වර්ධනයක් අත්පත් කරගෙන තිබේ. රක්ෂණ සහ විශ්‍රාම වැටුප් අරමුදල් ක්‍රියාකාරකම් 18%කින් ද, මූල්‍ය සේවා 13.2%කින් ද වර්ධනය වී ඇත. සංචාරක පැමිණීම් ඉහළ යාම හේතුවෙන් නවාතැන් සහ ආහාර සැපයුම් සේවා අංශය 9.3%ක ප්‍රගතියක් ලබා ඇත.
• කෘෂිකර්ම අංශය: කෘෂිකාර්මික කටයුතු 3.6%ක වර්ධනයක් පෙන්නුම් කළ ද, තේ වගාව (-8.1%) සහ මිරිදිය මත්ස්‍ය කර්මාන්තය (-45%) දැඩි පසුබෑමකට ලක්ව තිබීම විශේෂත්වයකි.

ආර්ථික ස්ථාවරත්වය සහ අභියෝග: මහ බැංකුව විසින් පවත්වාගෙන ගිය ස්ථාවර ප්‍රතිපත්ති සහ පෞද්ගලික අංශයේ ණය ප්‍රසාරණය මෙම වර්ධනයට මූලික පදනම සකසා ඇත. 

රුපියලේ අගය තරමක් පහළ ගිය ද, ලෝක වෙළඳපොළේ පවතින තත්වයන් මත ආනයනික අමුද්‍රව්‍ය මිල පහළ මට්ටමක පැවතීම දේශීය නිෂ්පාදන ක්ෂේත්‍රයට ශක්තියක් විය. 

කෙසේ වෙතත්, ‘දිත්වා’ (Ditwah) ආපදා තත්ත්වය හේතුවෙන් සිදුවූ ජීවිත හා දේපළ හානි මෙම සාර්ථකත්වය හමුවේ පවතින ප්‍රධාන අභියෝගයක් බව වාර්තාව තවදුරටත් පෙන්වා දෙයි.