දිවයින හරහා ගමන් කරමින් ඉන්දියාව දෙසට ඇදී යන මෙම සුළි කුණාටුව, පැයට කිලෝමීටර් 80 ක සුළං වේගයක් පවත්වා ගනිමින්, ඇතැම් අවස්ථාවලදී පැයට කිලෝමීටර් 100 දක්වා ඉහළ යා හැකි බවට කාලගුණ විද්‍යා දෙපාර්තමේන්තුව අනතුරු අඟවා තිබේ.

මෙම අයහපත් කාලගුණ තත්ත්වය හේතුවෙන් දිවයිනෙන් වාර්තා වන සමස්ත මරණ සංඛ්‍යාව 56 දක්වා ඉහළ ගොස් ඇති අතර, පුද්ගලයින් 21 දෙනෙකු තවදුරටත් අතුරුදහන්ව සිටී. 

පැය 24ක් තුළදී වාර්තා වූ වැඩිම වර්ෂාපතනය මාතලේ දිස්ත්‍රික්කයේ ගම්මඩුව ප්‍රදේශයෙන් මිලිමීටර් 540.60 ක් ලෙස වාර්තා වේ. උතුරු සහ නැගෙනහිර වෙරළබඩ ප්‍රදේශවලට නොවැම්බර් 29 වනදා දක්වා මීටර් 1 සිට 1.5 දක්වා වූ මුහුදු රළ ගැසීමේ අවදානමක් (Storm Surge) පවතින බැවින් ධීවර හා වෙරළබඩ ජනතාවට දැඩි අවධානයෙන් කටයුතු කරන ලෙස උපදෙස් නිකුත් කර ඇත.

ජනාධිපති අනුර කුමාර දිසානායක පෙරේදා (27) නියෝග කළ පරිදි මියගිය එක් අයකු වෙනුවෙන් රුපියල් මිලියනයක (රු. 1,000,000) වන්දි මුදල් පවුල් වෙත කඩිනමින් ලබා දීමට පියවර ගනිමින් සිටී. 

පාර්ලිමේන්තු අයවැය කාරක සභා අවස්ථා විවාද දින දෙකකට කල් දමා ඇති අතර, අත්‍යවශ්‍ය සේවා හැර අනෙකුත් සියලුම රාජ්‍ය ආයතන සඳහා විශේෂ නිවාඩු දිනයක් ප්‍රකාශයට පත් කර තිබේ.

ගංවතුර අනතුරු ඇඟවීම් සහ ගමනාගමනයට බාධා: 

අධික වර්ෂාව හේතුවෙන් මෙරට ප්‍රධාන ගංගා නිම්න රැසක ගංවතුර තත්ත්වයක් ඇතිවීමේ අවදානම ඉහළ ගොස් තිබේ. වාරිමාර්ග දෙපාර්තමේන්තුව විසින් ඉදිරි පැය 48 ඇතුළත කැලණි ගංගා ද්‍රෝණියේ පහත්බිම් සඳහා ප්‍රධාන ගංවතුර අවදානමක් නිකුත් කර ඇති අතර, එය කොළඹ, බියගම, කොලොන්නාව සහ වත්තල ඇතුළු ප්‍රාදේශීය ලේකම් කොට්ඨාස රැසකට බලපානු ඇත. එසේම කළු ගඟ සහ අත්තනගලු ඔය/උරුවල් ඔය නිම්නවල පහත්බිම් සඳහා ද ගංවතුර අවදානම් නිවේදන නිකුත් කර ඇත.

නාය යෑමේ අවදානම හේතුවෙන් කොළඹ – මහනුවර ප්‍රධාන මාර්ගය කෑගල්ල, මීපිටිය ප්‍රදේශයේදී තාවකාලිකව වසා දමා ඇති අතර, උඩරට දුම්රිය මාර්ග සහ මාතලේ දුම්රිය මාර්ගය ඇතුළු මාර්ග රැසක් නාය යෑම් සහ පස් කඳු කඩා වැටීම් හේතුවෙන් අවහිර වී ඇත. මාර්ග සංවර්ධන අධිකාරිය (RDA) දැනටමත් මාර්ග 75කට පමණ හානි වී ඇති බව තහවුරු කර තිබේ.

ජාතික වනෝද්‍යාන රැසක් (හෝර්ටන් තැන්න, වස්ගමුව, විල්පත්තුව වැනි) සංචාරකයන් සඳහා සම්පූර්ණයෙන්ම වසා දමා ඇති අතර, ආපදා තත්ත්වය පහව යන තෙක් ජනතාවට අනවශ්‍ය ගමන් බිමන් වලින් වැලකී සිටින ලෙසත්, නිලධාරීන්ගේ උපදෙස් පිළිපදින ලෙසත් බලධාරීහු තරයේ දැනුම් දෙති.