භාණ්ඩාගාර නියෝජ්‍ය ලේකම් ඒ. කේ. සෙනෙවිරත්න, පාර්ලිමේන්තුවේ රාජ්‍ය මුදල් කාරක සභාවට පැවසුවේ, රුපියල් බිලියන 100ක මුදල වසර 5ක කාලයක් තුළ ගෙවා දැමීමට නියමිත බවයි. ඒ අනුව, ඉන් රුපියල් බිලියන 20-25ක් අතර මුදලක් 2025 දී ‍රාජ්‍ය බැංකු වෙත ගෙවීමට නියමිතය.

මෙම ක්‍රියාවලිය සඳහා අවශ්‍ය අමතර අරමුදල් ලබා ගැනීම සඳහා පරිපූරක ඇස්තමේන්තුවක් පාර්ලිමේන්තුවට ඉදිරිපත් කිරීමට නියමිතය.

2026 සඳහා වන අයවැය ලේඛනවලට අනුව, රාජ්‍ය බැංකුවලින් ලබාගත් ණයවලින් රුපියල් බිලියන 50.67 ක් – මහජන බැංකුවෙන් පමණක් රුපියල් බිලියන 44.65 ක් – මහා භාණ්ඩාගාරය සහතික කර ඇත. 

සමස්තයක් වශයෙන්, ශ්‍රී ලංකන් ගුවන් සේවය විදේශ මුදල් ණයවලින් ඇමරිකානු ඩොලර් මිලියන 210 ක් පමණ සහ රුපියල් වලින් රුපියල් බිලියන 30 ක් පමණ ණය ලබාගෙන ඇති අතර, ඒ සියල්ල 2025 අවසන් වීමට පෙර ප්‍රතිව්‍යුහගත කිරීමට අපේක්ෂා කෙරේ.

වසරකට රුපියල් බිලියන 20 ක් පමණ වන මූලික ආපසු ගෙවීම් වසර පහක කාලයක් තුළ සිදු කරන බව නියෝජ්‍ය ලේකම්වරයා කමිටුවට පැවසීය. දැනට 16% ක් පමණ පොලී අනුපාත දරන රුපියල් ණය, SLFR + 1% බවට පරිවර්තනය කෙරෙන අතර, 10% කට ආසන්න අනුපාත සහිත ඩොලර් වලින් නම් කරන ලද ණය 6% ක් පමණ දක්වා අඩු කෙරේ.

මෙම පොලී අනුපාතවල සිදුවන වෙනස්කම් නිසා සිදුවන පාඩුව ආවරණය කිරීම සඳහා රුපියල් බිලියන 13කට ආසන්න “පළමු දින පාඩුවක්” (day one loss) සිදුවේ. 

මෙම ‘පළමු දින පාඩුව’ (Day One Loss) සෘජුවම ආවරණය කරන්නේ ශ්‍රී ලංකා රජය විසිනි.

ඒ අනුව මෙම ප්‍රතිව්‍යුහගත කිරීම, මහ බැංකු නීති මගින් බැංකු ද්‍රව්‍යශ්හීලතාවය (solvent) සහතික කිරීම සඳහා වසරක් පුරා පැවති සාකච්ඡා වල ප්‍රතිඵලයක් බව භාණ්ඩාගාර මෙහෙයුම් අතිරේක අධ්‍යක්ෂ ජනරාල් දමිතා රත්නායක පැවසුවා ය.

“සෑම වසරකම ශ්‍රීලංකන් ගුවන් සමාගම වෙත විශාල මහජන මුදලක් යොදවනවා, එය රටේ ආර්ථිකයේ පවතින කළු කුහරයක් වැනියි” මේ සම්බන්ධයෙන් අදහස් දක්වමින් COPF සභාපති ආචාර්ය හර්ෂ ද සිල්වා පැවසුවේ ය. 

“පසුගිය මාස අට තුළ ශ්‍ රීලංකන් ගුවන් සමාගමට ප්‍රධාන විධායක නිලධාරියෙක් නැහැ” යනුවෙන් පවසමින් ඔහු තවදුරටත් පෙන්වා දුන් ශ්‍රී ලංකන් ගුවන් සමාගමේ පවතින දුර්වල කළමනාකරණය සහ අකාර්යක්ෂමතාවයි. 

අතීතයේදී ද ශ්‍රී ලංකන් ගුවන් සමාගමට මෙවනි ප්‍රාග්ධන යෙදවීම් ලැබී ඇත.ඒ අනුව 2011 දී ඇමෙරිකානු ඩොලර් මිලියන 500කට සමාන ප්‍රාග්ධන යෙදවීමක් අනුමත කළ ද එය සම්පූර්ණයෙන්ම ලබා දී නොමැත.