ශ්රී ලංකන් ගුවන් සේවයට (SriLankan Airlines) අයත් වූ පැහැර හරින ලද හෙවත් පියවීමට නොහැකි වූ ණය ප්රතිව්යුහගත කිරීමේ සැලසුමක් ක්රියාත්මක කිරීමට සූදානමින් සිටින බව භාණ්ඩාගාර ලේකම් හර්ෂණ සූරියප්පෙරුම පවසා ඇත.
සිංගප්පූරු කොටස් වෙළෙඳපොළට (Singapore Stock Exchange) කළ දැනුම්දීමක දී ඔහු මෙසේ පවසා ඇත.
බාහිර ණය : ඒ අනුව ශ්රී ලංකාව බැඳුම්කර හිමියන් සමඟ ඇතිකරගනු ලබන ගිවිසුමක් මඟින් පවතින සමස්ත ණයවලින් 99%ක් ප්රතිව්යුහගත කිරීම මෙහි අරමුණයි.
“අද දින, අප විසින් අපගේ බාහිර හවුල්කරුවන් සමඟ පවතින සබඳතා සම්පූර්ණයෙන් යථා තත්ත්වයට පත් කිරීමේ සහ රාජ්ය මූල්ය නැවත යථා තත්ත්වයට පත් කිරීමේ අපගේ ප්රයත්නයන්හි නව පියවරක් තබමින් සිටිමු,” යනුවෙන් ඔහු තවදුරටත් සඳහන් කළේ ය.
“මෙම ගිවිසුමට ස්තූතිවන්ත වෙමින්, අපගේ බාහිර ණයවලින් 99%ක් දැන් නිරවුල් වනු ඇත.”
“අපගේ ණය ශ්රේණිගත කිරීම ශක්තිමත් කිරීමට බලපාන මෙම තීරණාත්මක නව අදියරේදී අපට සහාය වීම සඳහා අපගේ නිල හවුල්කරුවන්ගේ සහයෝගය අපි අපේක්ෂා කරමු,” යනුවෙන් භාණ්ඩාගාර ලේකම්වරයා වැඩිදුරටත් පැවසුවේ ය.
ඒ අනුව ස්වෛරීය (Sovereign) ඇපයක් සහිත ශ්රීලංකන් ගුවන් සේවයේ බැඳුම්කර, 4%ක වාරික වශයෙන් ගෙවිය යුතු (amortizing) නව ස්වෛරීය බැඳුම්කරවලට (sovereign bonds) සහ ඩොලර් මිලියන 60ක මුදල් සඳහා හුවමාරු කරනු ඇත.
කෙසේ වුවත්, ඩොලර් මිලියන 250ක් පමණ වන පැහැර හරින ලද ශ්රී ලංකාවේ ස්වෛරීය බැඳුම්කර, බැඳුම්කර හිමිකරුවෙකු විසින් රඳවා තබා ගැනීම හේතුවෙන් තවමත් හිඟව පවතී.
