කථානායක ආචාර්ය ජගත් වික්‍රමරත්නගේ ප්‍රධානත්වයෙන් පැවති පාර්ලිමේන්තු කටයුතු පිළිබඳ කාරක සභාවේදී මෙම තීරණය ගත් බව පාර්ලිමේන්තුවේ මහලේකම් කුෂානි රෝහණදීර මහත්මිය සදහන් කළා ය.

න්‍යාය පත්‍රය : ඒ අනුව 2026 අයවැයෙහි පළමු වර කියවීම සැප්තැම්බර් 26වන දිනට යොදා ඇති අතර අයවැය කථාව (දෙවන වර කියවීම) ජනාධිපති සහ මුදල් අමාත්‍ය අනුර කුමාර දිසානායක විසින් නොවැම්බර් 7 වන දින පාර්ලිමේන්තුවට ඉදිරිපත් කිරීමට නියමිත ය.

අයවැය විවාදයන් : ජනපතිවරයා අයවැය කථාව පාර්ලිමේන්තුවට ඉදිරිපත් කිරීමෙන් අනතුරුව දෙවන වර කියවීමේ විවාදය නොවැම්බර් 8 සිට 14 දක්වා දින හයක් පුරා පැවැත්වීමට නියමිත අතර, ඡන්ද විමසීම නොවැම්බර් 14 වන දින සවස 6ට පැවැත්වීමට නියමිත ය. 

අනතුරුව කාරක සභා විවාදය නොවැම්බර් 15 සිට දෙසැම්බර් 5 දක්වා දින 17ක් පුරා පැවැත්වෙන අතර, අයවැය තෙවන වර කියවීමේ ඡන්දය දෙසැම්බර් 5 වන දින සවස 6 ට පවත්වා සියලු කටයුතු අවසන් කිරීමට නියමිත ය.

මෙම කාල සීමාව තුළ පාර්ලිමේන්තුව ඉරිදා දිනයන් සහ රජයේ නිවාඩු දින හැර, සෙනසුරාදා දින ද ඇතුළුව සෑම සතියේ දිනකම රැස්වනු ඇත. 

මෙකී රැස්වීම් සඳුදා දිනවල පෙ.ව. 9:30ටත්, අනෙකුත් සියලුම දිනවල පෙ.ව. 9ටත් ආරම්භ වන අතර, දීර්ඝ විවාදයන්වලට ඉඩ ලබාදීම සදහා ප.ව. 6 දක්වා පැවැත්වීමට නියමිත ය.

එපමණක් නොව දිනපතා වාචික ප්‍රශ්න පහක්, ස්ථාවර නියෝග 27(2) යටතේ එක් ප්‍රශ්නයක් සහ ස්ථාවර නියෝග 22(1) සිට (6) දක්වා යටතේ වන කටයුතු සඳහා ද සෑම හමුවකදී ම කාලය වෙන් කරනු ඇත. 

ඊට අමතරව ඡන්ද විමසීම් සිදුකරන දිනවලදී හැර ප.ව. 6 සිට ප.ව. 6:30 දක්වා කාලය තුළ ආණ්ඩු පක්ෂය සහ විපක්ෂය අතර 50:50 පදනමක් මත විවාදයන් පැවැත්වෙනු ඇතැයි ද මහලේකම්වරිය වැඩිදුරටත් සදහන් කළා ය.