පොලිස් අත්අඩංගුවට පත්වීමෙන් පසු මිය ගිය ආර්. රාජ්කුමාරි නම් ගෘහ සේවිකාවගේ මරණය සම්බන්ධයෙන් සැක කටයුතු පුද්ගලයන්ව අත්අඩංගුවට ගන්නා ලෙස අධිකරණය නියෝග කර ඇතැයි නීතීඥවරුන් පවසයි.

මරණයට හේතුව: අභ්‍යන්තර රුධිර වහනය වීම නිසා සිදු වූ කම්පන තත්ත්වයක් (hemorrhagic shock) හේතුවෙන් මරණය සිදු වූ බවට අධිකරණ වෛද්‍ය නිලධාරීවරයාගේ පශ්චාත් මරණ පරීක්ෂණ වාර්තාවෙහි දැක්වෙන අතර මොට ආයුධයකින් පහර දීම හෝ ඒ හා සමාන බලයක් හේතුවෙන් සිදු වූ කම්පනයක් මරණයට හේතු වී තිබේ.

අධිකරණ නියෝග: රාජ්කුමාරිගේ මරණයට සම්බන්ධ සැකකරුවන් අත්අඩංගුවට ගන්නා ලෙස කොළඹ අතිරේක මහේස්ත්‍රාත් හර්ෂණ කැකුළාවල විසින් අපරාධ පරීක්ෂණ දෙපාර්තමේන්තුවට නියෝග කරන ලදී.

මියගිය තැනැත්තියගේ පශ්චාත් මරණ පරීක්ෂණ වාර්තාව අධිකරණයට ඉදිරිපත් කිරීමෙන් අනතුරුව අදාළ නියෝගය නිකුත් කර ඇත.

තව ද මෙම නඩුව ඔක්තෝබර් 27 වන දා නැවත කැඳවන අතර එදිනට විමර්ශන කටයුතුවල ප්‍රගතිය සම්බන්ධයෙන් වාර්තාවක් ඉදිරිපත් කරන ලෙස මහේස්ත්‍රාත්වරයා අපරාධ විමර්ශන දෙපාර්තමේන්තුවට දැන්වීය.

මිය ගිය තැනැත්තිය වෙනුවෙන් පෙනී සිටි නීතීඥවරු: සේනක පෙරේරා, ප්‍රබෝධ රත්නායක, තම්බයියා ජෙයරත්නරාජා, ස්වස්ථික අරුලින්ගම්, ධනුෂ්ක සිල්වා සහ නිරෝෂන් කුමාර යන නීතීඥවරු මිය ගිය තැනැත්තිය වෙනුවෙන් පෙනී සිටියහ.

මිය ගිය තැනැත්තිය කවුද: අදාළ 42 හැවිරිදි කාන්තාව, ව්‍යාපාරික කාන්තාවක් වන සුධර්මා නෙත්තිකුමාරගේ නිවසෙහි සේවය කරමින් සිටියදී මුද්දක් සොරකම් කළා යැයි වන චෝදනාවට මැයි 11 වන දා වැලිකඩ පොලිසිය විසින් අත්අඩංගුවට ගන්නා ලදී.

කෙසේ නමුත්, ඇයව අත්අඩංගුවට ගෙන ප්‍රශ්න කළ බවට පොලිස් වාර්තාවල සටහන් වී නැත.

මැයි 12 වන දා රෝහලට ඇතුළත් කරන විටත් අදාළ කාන්තාව මියගොස් ඇතැයි පැවසේ.